கண்முன் விரிந்த கனவு

யோகபிரியா (yogapriya_yp)

அக்டோபர் மாதத் தலையங்கம் உயர்கல்வி நிறுவனங்களில் மாணவர் மன்றங்கள் செயல்பட வேண்டியதன் அவசியத்தையும், மாணவர் மன்றத் தேர்தல்களை எவ்வாறு ஜனநாயக முறைப்படி நடத்த வேண்டும் என்பதையும், மாணவர் மன்றங்கள் சிறப்பாகச் செயல்பட்டால் அவை சமூகத்தில் எத்தகைய நேர்மறையான தாக்கங்களை ஏற்படுத்தும் என்பதையும் விளக்கியது.

மாணவர்களின் ஜனநாயகப் பங்கேற்பையும், அரசியல் விழிப்புணர்வையும் வளர்ப்பதற்கு, இது மிகவும் அவசியமானதாகும்.

வைதேகி (readsandscenes)

மத, சாதிய வன்முறைகளின் களமாகக் கல்லூரிகளும் பல்கலைக்கழகங்களும் மாறிவிடும் என்று அதிகார அமைப்புகள் மாணவர் மன்றத் தேர்தல்களை முடக்கியிருந்தால் அது என்னை பூசி மெழுகும் சமாச்சாரம். இளைஞர்களின் சமூக அக்கறையினைப் பலவீனப்படுத்துவதற்காக பின்னப்பட்ட சூழ்ச்சியே அது. மாணவ இயக்கங்கள் வன்முறைகளின் உறைவிடம் என்று தொடுக்கபட்டிருக்கும் பிம்பம் முற்றிலும் கண்டிக்கத்தக்கது. ஒரு புரட்சிக்குரல் தப்பித்தவறியும் எழுந்துவிடக் கூடாது என்பதில் அதிகார மையங்கள் தெளிவாக இருந்ததின் விளைவே இம்மாணவ இயக்கங்களின் தேர்தல் என்ற ஒன்று இன்று இல்லாமல் போனது.

பிறகு தகுதியான தலைவர்கள் எங்கிருந்து வருவார்கள்? மக்களால் நடிகர்களைத்தான் தலைவர்களாக்க முடியும். சட்டசபைக் காணொளிகளில் அப்டேட்டாக இருந்தால் நாமெல்லாம் அரசியல் அறிவுஜீவிகள் என்ற மாயப்பெருமிதம் மட்டும்தான் மிச்சம்.

காயத்ரி (Books_and_lits)

காலச்சுவடு இதழ் புத்தகங்கள், வாசிப்பனுபவங்கள், எழுத்தாளர்கள் பற்றிய தகவல்கள், அவர்களது பங்களிப்புகள் ஆகியவற்றின் கலவையாக மட்டும் இருக்குமென நினைத்திருந்த என் மடமைக்கு முற்றுப்புள்ளி வைத்தாகி விட்டது. 40 ஆண்டுகளுக்கும் மேலாக நாட்டின் ஒவ்வொரு மாநிலத்திலும் நடந்துவரும் வெளிச்சத்திற்கு வராத ஜனநாயக அழிவைப் பற்றிய விழிப்புணர்வை எனக்கு அளித்தமைக்கு நன்றிகள்.

அப்பப்பா! மாணவர் மன்றத் தேர்தல் குறித்த எத்துணை விஷயங்கள் வெறும் 7-10 நிமிட வாசிப்பில் கிடைத்துவிடுகிறது. நீட் போன்ற மாணவர்களை நேரடியாக பாதிக்கும் விஷயங்களில் மாணவர் மன்றப் பிரதிநிதிகள் சட்டமியற்றும் இடங்களில் பங்கு பெற்றால் எப்படியிருக்கும் என்ற கனவு கண்முன் விரிந்தது!

அக்‌ஷயா  (boldandunderlined.by.akshaya)

சமூக அரசியல் பொருளாதாரம் குறித்து அடிப்படை கூட தெரியாதவர்களை நம்மை ஆள்பவர்களாக அமரவைத்திருக்கும் இச்சூழலில், கல்லூரிகளில் மாணவர் மன்றத் தேர்தல்கள் நடத்தவேண்டியது குறித்து வெளியாகியுள்ள தலையங்கம் காலத்தின் குரல்.

இந்திய அளவில் இடதுசாரி மாணவர் அமைப்புகள், பல்வேறு பிரச்சனைகள், போராட்டங்களில் குறிப்பிடத்தக்க பங்காற்றி வருகின்றனர். ஆனால், இடதுசாரி மாணவர் அமைப்புகள் பற்றி ஒரு வரி கூடச் சொல்லாமல் இத்தலையங்கம் கடக்கிறது. மாணவர் தேர்தல்களை மீட்க வேண்டும் என்ற நோக்கம் நியாயமானது. தரவுகள் அடிப்படையில், பல்வேறு கோணங்களையும் கொண்டிருந்தால் இன்னும் பயனுள்ளதாக இருந்திருக்கும்.