தத்வமசி

-தத்வமசி

17ஆம் நூற்றாண்டின் சோழமண்டலக் கரையிலும் யாழ்ப்பாணக் குடாநாட்டிலும்

டச்சுக்காரர்களின் காலனிய நிழல் படர்கிறது. குருதியும் அடிமை வணிகமும் பேரழிவும்

மலிந்த பெருநிலத்தில், வாழ்வின் நிலையாமையை முகத்திலடித்தாற்போல் உணர்ந்து

மனை துறக்கிறான் ஒருவன். அகத்தின் வெளிச்சத்தைத் தேடி அலையும் அவனுக்குக்

காலம் சூட்டும் பெயர் ‘தத்வமசி’.

கிரிசாந்தின் பிரம்மாண்டமான புனைவெழுத்து, வரலாற்றின் அந்தகார உண்மைகளையும்

தத்துவத்தின் ஆழங்களையும் ஒன்றிணைக்கிறது. மானுட இருப்பைப் பற்றியும், அதன்

நித்தியமான ஆன்மீகத் தேடலைப் பற்றியும் துணிச்சலாகக் கேள்வி எழுப்பும் ஒரு

காலத்தின் பெருஞ்சித்திரம்.

அதிகாரத்தின் வாள்முனையில் அடியோடு வீழும் வாழ்விலிருந்து, ஆத்மா தன்

விமோசனத்தைக் கண்டடையும் தத்துவப் பயணம் இந்நாவல்.

அட்சரேகை

-அட்சரேகை

கானலை நதி என்று நினைத்து நீந்தியவர்கள், அவர்களை ஆதரிசமெனக் கொண்டு நீந்த இறங்கியவர்களின் கதைகளும் கிளைக்கதைகளுமாக விரிகிறது கார்த்திக் பாலசுப்ரமணியனின் அட்சரேகை. இதில் இளமைக்கே உரிய வழக்கமான இலட்சியங்கள் பொருளிழக்கின்றன; அவற்றை நோக்கி நடையாய் நடந்த பாதை களிலும் ஒளி அவிந்துவிடுகிறது. பின் மிஞ்சுவது நினைவுகள் மட்டுமே. நினைவுகளில் செதுக்கிவைத்திருப்பவர்கள் புனைவின் கடைசிப் பக்கம் வரையிலும் உயிர்ப்புடன் வருகிறார்கள். ஏதேதோ திசைகளிலிருந்து, எதிர்பாராத திருப்பங்களிலிருந்து, சிலர் மறைந்த பின்னும், ஏன் செத்த பின்னும்தான்.

நினைவுகளோடு கலந்துவரும் பல்வேறு இடவெளிகளின் குவிமையமாகிறது ஒரு சிறிய அறை. அரசு வேலைகளுக்கான தேர்வுகளுக்குப் படிப்பவர்களுக்கு அவர்களது போராட்டங்களின், வீழ்ச்சிகளின், காயங்களின் சாட்சியாக இருக்கும் அறை. கதையை நகர்த்திச் செல்லும் சமூக, பொருளாதார வரலாறுகளை அந்த அறை பார்க்கிறது. அதன் கண்களோடு வாசகர் தன் கண்களைச் சேர்த்து இமைக்கக் கேட்கிறது.

கார்த்திக்குக்கு அநாயாசமாய் வசப்பட்டிருக்கும் யதார்த்த அழகியலோடு கூடவே சிதறுண்ட உணர்வுகளின் வண்ணங்களும் துல்லியமான விவரணைகளும் கதாபாத்திரங்கள் அடையும் பரிணாமங்களும் நாவலின் வலுப்புள்ளிகள். வாசகரை அவை பிரதிக்குள் இழுத்துப்போடுகின்றன.

தோறை

-தோறை

மொழியாலும் கதை சொல்லும் வடிவத்தாலும் புதிய பாய்ச்சலை அடைந்திருக்கிறது யதார்த்தனின் ‘தோறை’. 

பெண்ணுக்கு முதல் தெய்வம் காமம். காமம் அவளுக்குக் காற்றில் இருக்கிற வெக்கை. தெய்வமாகிற பெண்களே நாச்சிமாரும் நகுலாத்தையும் தென்குமரிப் பெண்ணும் நீலிகளும் யட்சிகளும். காடு, மலை, கடல், களனி என்று எல்லா இடமும் தனித்து நிற்கிறார்கள். கன்னித் தெய்வங்களும் தேவித் தெய்வங்களும் தாய்த் தெய்வங்களும் ஒரே தெய்வத்தின் பல்வேறு வடிவங்களே என்கிறது இந்நாவல்.

பெண் தனது தாய்மையை ஏற்பதையும் மறுப்பதையும் போற்றுவதையும் ‘தோறை’ நாவல் விவாதிக்கிறது. தொன்மக் கதைகளின் வழியாகவும் கூத்துவடிவக் குரலிலும் நாடக வடிவத்திலும் வாசகருடன் உரையாடுகிறது. 

யதார்த்தனின் இரண்டாவது நாவல் இது.

வாங்கல்

-கடலோடும் அலைகளோடும் கடல்வாழ் மீன்களோடும் உள்ள உறவும் போராட்டமும்தான் ‘வாங்கல்’ நாவலாய் விரிந்திருக்கின்றன. ஏதாவதொரு நாளில் யாராவது ஒரு மனிதனைக் கடல் உள்வாங்குகிறது. அந்தக் கொடுமையைப் பார்த்தபடியே அடுத்த நாள் வாழ்க்கையை அதே கடலோடு தொடர்கிறார்கள் இந்த எளிய மக்கள். 

ஒரு பகுதி மக்களின் வாழ்வு அப்பகுதி மக்களோடு முடியாமல், அடுத்த பகுதி மக்களையும் தன்னோடு சேர்த்துக்கொள்கிறது. தென் மாவட்டக் கடற்கரையோர மீனவர்களின் வாழ்க்கையை மாறுபட்ட கோணத்தில் பேசுகிறது இப்படைப்பு. இந்நாவலில் நாம் பார்க்கிற காட்சிகள் எளிய மக்களின் வயிற்றுப்பாட்டை உணர்த்துகின்றன. இந்த வாழ்க்கைச் சவால்தான் ‘வாங்கல்’.

கனவுகளின் வரைபடம்

-இளம்பருதியின் வாழ்க்கை ஈழத்தின் யோகபுரத்தில் தொடங்குகிறது. அது கனடாவின் பனி படர்ந்த வீதிகள் வரை நீள்கிறது. அவனது இளமைக்காலம் இடதுசாரிச் சிந்தனைகளும் லட்சியங் களும் நிறைந்தது. ஆனால், போர் அந்த வாழ்வைச் சிதைக்கிறது. அவன் புகலிடம் தேடிப் புலம்பெயர்கிறான்.

புதிய தேசத்தில் தனது அடையாளத்தைத் தேட முயற்சிக்கிறான். இன்னொரு பக்கம், அன்றாட உழைப்பிலேயே வாழ்க்கை கரைந்துபோகிறது. புலம்பெயர்ந்த தமிழர்களின் வாழ்வில் உள்ள இத்தகைய முரண்பாடுகளை நாவல் பேசுகிறது.

புகலிட வாழ்வின் பொருளாதாரத் தேவைகள் மனித உறவுகளில் விரிசலை உண்டாக்குகின்றன. திருமண உறவுகள்கூட வணிகமாக மாறிப்போகின்றன. இவற்றை பொ. கருணாகரமூர்த்தி நாவலில் அழுத்தமாகப் பதிவு செய்கிறார்.

ஈழம், கனடா என இரு வேறு நிலப்பரப்புகளுக்கு இடையே இந்தப் பயணம் அமைகிறது. இந்த வரைபடம் சிதைந்த மனங்களின் சாட்சியமாக நிற்கிறது. வாழ்வின் கசப்பையும் இனிப்பையும் ஒருசேரப் பகிர்ந்துகொள்கிறது.

மாய மலர்

-இளம் பிராயத்தின் தீவிரத்தில் வாழ்வையும் வாழ்வுக்கான பொருளையும் தேடும் பெண்களது ஊடாட்டம் காலவோட்டத்தில் மெல்ல நிலைகொள்ளும்போது தெளிந்தோ, மங்கியோ ஒரு புதிய வண்ணத்தை ஏற்கிறது. அப்போது உறவுகள் எதிர்பாராத புதிய பரிமாணத்தை அடைகின்றன. சுவாரஸ்யமான தொடர் நிகழ்வுகளின் பின்னணியில், குறித்த ஒரு காலகட்டத்துப் பெண்களைக் கொண்டு படைக்கப்பட்டிருக்கும் ‘மாய மலர்’ இந்த ஊடாட்டத்தையும், மாற்றத்தையும் மைய இழையாகக் கொண்டு நீள்கிறது. திருச்சியின் வெங்காட்டிலும் கொடைக்கானலின் தண்ணிலத்திலும் விரிவு கொள்ளும் கதையில் இந்தத் தீவிர எதிர்மையைத் தனது பாத்திரங்களில் பொதிந்துவைத்து நாவலாக்கியிருக்கிறார் லாவண்யா சுந்தரராஜன்.

நாவலின் பெண்களுக்கு வாழ்க்கை தனது மாயப் பேழையிலிருந்து எதைக் கையளித்தது என்பதற்கான விடையை நோக்கிக் கதை நகர்கிறது. ஒருபக்கம் காயமுற்ற பால்யம், ஆதர்ச நட்பு, காதல், தாம்பத்தியம் இவற்றால் உருவாகும் உறவுச் சிக்கல்களும், மறுபக்கம் குற்றவுணர்வும் வலிந்து ஏற்றுக்கொண்ட மாறாக் கன்னிமையும் உருவாக்கும் அக இறுக்கமுமாக நாவலின் கதாபாத்திரங்களை அலைக்கழிக்கின்றன. எல்லாப் பாவனைகளுக்கும் பகிர்தலுக்கும் அப்பால் கேட்கப்படாத மன்னிப்பும் காட்டப்படாத அன்புமே மறைந்து நிற்கிறது என்பதை வெவ்வேறு வழிகளில் புலப்படுத்த முயலுகிறது ‘மாய மலர்’.

அஸ்தினாபுரம்

-கடலோர மக்களின் வாழ்வைப் பல்வேறு பரிணாமங்களுடனும் காலப்போக்கில் அவர்கள் அடைந்துவரும் மாற்றங்களுடனும் கலாபூர்வமாகப் பதிவுசெய்துவருபவர் ஜோ டி குருஸ். ‘ஆழிசூழ் உலகு’, ‘கொற்கை’ ஆகிய நாவல்களைத் தொடர்ந்து அவர் எழுதிய மூன்றாவது நாவல் ‘அஸ்தினாபுரம்’.

கடலோரத்தில் பிறந்த ஒருவன் கப்பல் சரக்குப் போக்குவரத்துத் துறைக்குச் செல்வதையும் அந்தத் துறையில் பல்வேறு போராட்டங்களுக்கிடையில் உயர்ந்த நிலையை அடைவதையும் சொல்லும் ‘அஸ்தினாபுரம்’ கப்பல் சரக்குப் போக்குவரத்துத் துறை சார்ந்த கதையாகவும் விரிகிறது. கள அனுபவமும் அபாரமான நிர்வாகத் திறனும் கொண்ட நாவலின் மையப்பாத்திரம் வழியே ஜோ டி குருஸ் பல்வேறு விஷயங்களை உணர்த்துகிறார். பல கேள்விகளை எழுப்புகிறார். கப்பல் போக்குவரத்துத் துறை செயல்படும் விதத்தைக் கதைப்போக்கினூடே மிக நுட்பமாகவும் துல்லியமாகவும் சொல்கிறார். கூடவே ஒரு தனிமனிதனின் வாழ்வை யும் அவன் வாழ்வு எவ்வாறு பிற மனிதர்களுடன் பிணைந்தும் அறுந்தும் மீண்டும் இணைந்தும் பயணிக்கிறது என்பதையும் காட்டுகிறார். மானுட இனத்தின் கீழ்மை சமூகத்தின் சகல அடுக்கு களிலும் பரவியிருக்கும் இன்றைய யதார்த்தத்தையும் நாவல் கவனப்படுத்துகிறது.

கோபல்லபுரத்து மக்கள்

-கோபல்லபுரத்து மக்களின் எளிமையும் வெள்ளந்தி மனமும்தான் இந்த நாவலின் உயிரோட்டம். அந்தக் கிராமத்தின் ஆன்மாவைத் தன் எழுத்தால் கி.ரா. படம் பிடிக்கிறார்.

மண் ஒன்றானாலும் மனங்கள் பிளவுபட்டிருக்கின்றன. இந்தப் பிளவை நாட்டில் நடக்கும் விடுதலைப் போரோடு இணைக்கிறார்; கோபல்லபுரத்தாரால் நேரடியாகப் போரில் ஈடுபட முடியவில்லை. ஆனாலும்  தலைவர்களின் நோக்கையும் போக்கையும் கண்டு விமர்சனம் செய்யும் அளவுக்கு அவர்களின் வாழ்க்கைக் கண்ணோட்டம் விரிவடைகிறது.

‘கோபல்ல கிராமம்’ நாவலின் தொடர்ச்சியாக எழுதப்பட்ட இந்த நாவலில் சமகால வரலாற்றுச் சம்பவங்களின் பின்னணியில் சாதாரண மக்கள் நாயகர்களாக விளங்குவதைத் தனக்கே உரிய நடையில் சொல்கிறார் கி.ரா. ஒவ்வொரு வரியிலும் மண் வாசனை வீசும் இந்த நாவல் தமிழின் சிறந்த வட்டார வழக்கு நாவல்களில் ஒன்று என்னும் சிறப்பையும் பெற்றது.

1991ஆம் ஆண்டு சாகித்திய அகாதெமி விருது பெற்ற நாவல் இது.

கிருஷ்ணா கிருஷ்ணா

-இந்தியப் புராண, இதிகாசங்களில் தனித்துவம் மிக்க பாத்திரங்களில் ஒருவன் கிருஷ்ணன். மானுட வடிவம் எடுத்த நிலையிலும் பெரும்பாலும் தெய்வமாகவே செயல்பட்டவன். எனினும் மானுடப் பண்புகளான காதல், நட்பு முதலானவற்றை வெளிப்படுத்தியவன். இவற்றையும் தாண்டி, தத்துவம், இசை எனப் பல்வேறு பரிமாணங்கள் கொண்டவன்.

வண்ணமயமான பன்முக ஆளுமையாக விளங்கும் கிருஷ்ணனை மையமாகக் கொண்டு இந்திரா பார்த்தசாரதி எழுதிய நாவல் இது. கிருஷ்ணனைச் சமகாலப் பின்னணியில் வைத்துக் காணும் அணுகுமுறையே இந்த நாவலின் தனித்தன்மை.

ராணி வேலு நாச்சியார் - சிவகங்கையின் சாகச அரசி

-பதினெட்டாம் நூற்றாண்டின் தொடக்கத்தில் ஆற்காட்டின் பிரதான மாகாணங்களை

நவாப்கள் தங்கள் கட்டுக்குள் கொண்டுவருகிறார்கள். சிவகங்கை என்னும் சிறிய நாடு

அதன் மன்னர் முத்துவடுகநாத தேவரின் மரணத்திற்குப் பிறகு மிகுந்த

இக்கட்டிற்குள்ளாகிறது. அவரது இணையரான அரசி வேலு நாச்சியார் தன்

தளபதிகளுடனும் மக்களுடனும் அரண்மனையை விட்டு வெளியேற வேண்டியதாகிறது.

தன்னைக் கொல்வதற்காக ஆற்காட்டிலிருந்து அனுப்பப்பட்ட ஒற்றர்கள்,

கொலையாளிகள் உள்ளிட்ட பல்வேறு இடையூறுகளைத் தாண்டி வானாந்தரத்திலிருந்து

விரைவிலேயே மீளும் வேலு நாச்சியார் வீறுகொண்டு எழுந்தார். சிவகங்கையின்

படையில் பெண்களையும் சேர்த்து அவர்களுக்குக் கெரில்லாப் போர்முறையிலும்

தற்காப்புக் கலைகளிலும் பயிற்சியளித்தார்.

ராணி வேலு நாச்சியாரின் வீரமிகு வாழ்வைச் சொல்லும் இந்த வரலாற்றுப் புனைவு

அந்தக் காலத்து வரலாற்றை நம் கண்முன் நிறுத்துகிறது. சுபேந்திரா எழுதியுள்ள வேலு

நாச்சியாரின் வீரமிகு வாழ்வை விறுவிறுப்பான நடையில் தமிழில் தந்திருக்கிறார் இல.

சுபத்ரா.

எம்.எல்.

-இந்தியாவில் நிலவும் பல்வேறு பிரச்சினைகளுக்கும் ஆயுதப் போராட்டமே தீர்வு என்னும் அணுகுமுறையை நம்பியவர் சாரு மஜூம்தார். அவரால் ஈர்க்கப்பட்ட பல இளைஞர்கள் அவரது இயக்கத்தில் இணைந்தார்கள். அப்படிச் சென்ற தமிழ் இளைஞர்கள் சிலரது வாழ்வை மையமாகக் கொண்ட நாவல் எம்.எல்.

தனிநபர்களின் வாழ்வைப் பின்தொடரும் இந்த நாவல் அதனூடே எம்.எல். சித்தாந்தத்தின் சாதக பாதகங்களை அலசுகிறது. பொதுவுடமைத் தத்துவத்தின் இன்றைய நிலை என்ன, அந்தத் தத்துவத்தை வரித்துக்கொண்ட நாடுகளின் நிலை என்ன என்ற கேள்விகளையும் எழுப்புகிறது.

நேரடி அனுபவங்களும் சித்தாந்தங்கள் சார்ந்த சிந்தனைகளும் இணையும் இந்த நாவல் தமிழின் நேரடியான அரசியல் நாவல்களில் ஒன்று. மிகையோ உணர்ச்சிப்பிசுக்கோ நாடகீயமான அம்சங்களோ இல்லாமல் யதார்த்தத்தில் காலூன்றி எழுதியுள்ளார் வண்ணநிலவன்.

பம்பாய் சைக்கிள்

-இந்திய அமைதிகாக்கும் படை  இலங்கையில் புகுந்த நாளிலிருந்து  வெளியேறிய நாள்வரை, ஈழத்தின் மண்ணுக்கும் மக்களுக்கும் நிகழ்ந்ததைச் சித்திரிக்கும் படைப்பு இது. இந்தியாவை நட்பு நாடாகவே கருதிவந்த ஈழத் தமிழர்களின் எண்ணம் இதன் பிறகு மாறியதாகவே பலரும் கருதுகிறார்கள். இந்திய அமைதிப்படை ஈழத்தில் தங்கியிருந்த காலத்தின் நிகழ்வுகளைச் சொல்லும் இந்த நாவல் அதனால் ஈழத் தமிழர் மனங்களிலும் வாழ்விலும் ஏற்பட்டுவிட்ட நிரந்தரமான மாற்றங்களை அடையாளம் காண முயல்கிறது. வரலாற்றுப் பதிவை காலாபூர்வமான கண்ணோட்டத்துடன் முன்வைக்கும் இரவி அருணாச்சலம் ஈழத் தமிழரின் வாழ்வையும் வரலாற்றையும் புனைவின்வழி ஆவணப்படுத்திவருகிறார். அந்த வகையில் இது அவரது ஐந்தாவது நாவல்.