வரலாறும் வழக்காறும் (இ-புத்தகம்)

வரலாற்றை அறிவதற்கான ஆகிவந்த முறைகளைத் தாண்டிச் செல்கிறது ஆ. சிவசுப்பிரமணியனின் இந்த நூல். மக்களிடையே புழங்கும் வாய்மொழி வழக்காறுகளும் வழிபாட்டு முறைகளும் வரலாற்றை அறிவதற்கான சான்றுகளாக இருக்க முடியும் என்பதை இந்நூல் உணர்த்துகிறது. ஆசிரியரின் தர்க்கப்பூர்வமான ஆய்வு முறை புதிய தரவுகள் மூலம் வரலாற்றின் மற்றொரு பகுதியை அடையாளம் காட்டுகிறது. வரலாறு, சமூகம் குறித்த நம்முடைய பார்வையை மறுபரிசீலனை செய்துகொள்ளத் தூண்டுகிறது.

பௌத்த தியானம்

-உள் மன ஆழத்தில் உறைந்து மறைந்திருக்கும் மாசுகளை வெளிக்கொணர்ந்து வேரோடுகளைந்தெறியவும், உயிர் வாழ்வின் உண்மையை உள்ளது உள்ளவாறு கண்டறியவும், பிணைக்கும் தளைகளிலிருந்து பூரணமாகவும் நிரந்தரமாகவும் விடுதலை பெறவும் ஒரே வழி என்று புத்தர் தமது அனுபவத்தில் கண்டுபிடித்து உலகுக்கு அருளிய விபஸ்ஸனா தியான முறை பௌத்தத்தின் தனிச் சிறப்பாகும். பௌத்தம் காட்டும் அமைதித் தியானம், விபஸ்ஸனா தியானம் ஆகிய இரண்டு தியான முறைகளையும் அனைவரும் பயின்று பயன்பெறும் வகையில், விரிவாகவும் தெளிவாகவும் கூறுகின்றது இந்த நூல். உறவுகளைத் தியானிப்பது, மரணத்தைத் தியானிப்பது, சூன்யத்தைக் தியானிப்பது, பிரம்ம விஹாரங்களில் உறைதல், ட்சென் தியானம் ஆகியவையும் விரிவாக விளக்கப்பட்டுள்ளன. வாழ்வின் உன்னதக் குறிக்கோளான புத்த சித்தம் பெறுவதற்கான தியானத்தை விவரிக்கும் இந்த நூல் அனைவரும் படித்துப் பயன்பெறவேண்டிய ஒன்றாகும்.

உலகப் புகழ்பெற்ற மூக்கு (இ-புத்தகம்)

கதைகள் நம் வாழ்வில் கொட்டிக் கிடக்கின்றன. அடையாளம் காணத் தெரிந்த கண்களுக்கு அவை தம்மை வெளிப்படுத்திக்கொள்கின்றன. மிகமிகச் சாதாரண நிகழ்வொன்று பெரும்பாலானோர் கடந்துபோய்விடக்கூடிய நிகழ்விலும் மகத்தான கதை ஒன்று ஒளிந்திருக்கலாம். வைக்கம் முகம்மது பஷீரைப் போன்ற மகத்தான கலைஞர்களுக்கு மட்டும் அது தெரிந்துவிடுகிறது. மிகச் சாதாரணமான, மிக எளிமையாகத் தோற்றமளிக்கும் அன்றாட வாழ்வின் சலனங்கள் இந்தக் கலைஞனின் கண்பட்டு அற்புதப் படைப்புகளாக உருப்பெறுகின்றன.
இயல்பான சந்திகளில், மொழிநடையில் கதை சொல்லும் பஷீர் தன்னுடைய மிக இயல்பான, தனித்துவமிக்க எடுத்துரைப்பால் மிக எளிமையான தருணங்களையும் நித்தியத்துவத்தின் சுழற்சியினுள் பொருத்திவிடுகிறார்.
நம்பூதிரியின் கோட்டோவியங்கள், எம்.டி. வாசுதேவன் நாயர், எம்.என். விஜயன் ஆகியோரின் கட்டுரைகள், அபூர்வமான புகைப்படங்கள் ஆகியவை இந்தத் தொகுப்புக்கு அணி சேர்க்கின்றன.

எழுத்துக்கு அஞ்சும் சமூகம் (இ-புத்தகம்)

பெருமாள்முருகனின் படைப்பனுபவங்கள், வாழ்க்கைக் கூறுகள், சமூகப் பார்வை, ஆளுமைப் பகிர்வு ஆகியவற்றை ஆழமாக உணரச் செய்பவை இந்த நேர்காணல்கள். மேட்டாங்காட்டுக் களத்துமேட்டில் அந்தி சாயும் வேளையில் பெருமாள்முருகனுடன் அமர்ந்துகொண்டு கேட்கும் ஆசுவாசமான கதைகள் இவை. நாவல், கவிதை, சிறுகதை, கட்டுரை, பதிப்பு, கீர்த்தனை என வெவ்வேறு இலக்கிய வடிவங்களில் தடம் பதித்துவரும் பெருமாள் முருகனின் ஒவ்வொரு நேர்காணலும் அவரது ஆளுமையின் பரிமாணங்களைக் காட்டுகின்றன. படைப்பு வாழ்க்கையில் சந்தித்த நெருக்கடிகளும் போராட்டங்களும் அவை கற்பித்த மௌனமும் வார்த்தைகளின் இடுக்குகளில் இழையோடியிருக்கின்றன. சொற்களுக்கு இடையிலான மௌனங்களை நுட்பமாக உய்த்துணர்பவர்களுக்கு இந்தத் தொகுப்பு முழுமையான இலக்கிய அனுபவத்தை அளிக்கும்.

பிரேம்குமார்

வாங்கல் (இ-புத்தகம்)

கடலோடும் அலைகளோடும் கடல்வாழ் மீன்களோடும் உள்ள உறவும் போராட்டமும்தான் ‘வாங்கல்’ நாவலாய் விரிந்திருக்கின்றன. ஏதாவதொரு நாளில் யாராவது ஒரு மனிதனைக் கடல் உள்வாங்குகிறது. அந்தக் கொடுமையைப் பார்த்தபடியே அடுத்த நாள் வாழ்க்கையை அதே கடலோடு தொடர்கிறார்கள் இந்த எளிய மக்கள். ஒரு பகுதி மக்களின் வாழ்வு அப்பகுதி மக்களோடு முடியாமல், அடுத்த பகுதி மக்களையும் தன்னோடு சேர்த்துக்கொள்கிறது. தென் மாவட்டக் கடற்கரையோர மீனவர்களின் வாழ்க்கையை மாறுபட்ட கோணத்தில் பேசுகிறது இப்படைப்பு. இந்நாவலில் நாம் பார்க்கிற காட்சிகள் எளிய மக்களின் வயிற்றுப்பாட்டை உணர்த்துகின்றன. இந்த வாழ்க்கைச் சவால்தான் ‘வாங்கல்’.

இலக்கண உருவாக்கமும் பயிற்றியல் மரபும் (இ-புத்தகம்)

இலக்கண உருவாக்கமும் பயிற்றியல் மரபும் உலக மொழிகளில் தோன்றிய மரபிலக்கணங்கள் அனைத்தும் பயிற்றுவிப்பதற்காக எழுதப்பட்டவை என்னும் கற்பிதத்தின் அடிப்படையில், இலக்கண உருவாக்கம் பயிற்றியல் மரபை உள்வாங்கி நிகழும் செயற்பாட்டு ஒழுங்கமைவு என்னும் கருதுகோளை முன்வைக்க முடியும். இக்கருதுகோளை அகச்சான்றுகளாலும் புறச்சான்றுகளாலும் விசாரணைக்கு உட்படுத்தி, மரபிலக்கணங்கள் அமைப்பிலும் பயன்பாட்டிலும் பயிற்றிலக்கணங்களே என இந்நூல் நிறுவுகிறது. இலக்கணத்தின் உள்ளடக்கத்தை விவரிக்கும் சிறப்புப்பாயிரமும், இவ்வுள்ளடக்கத்தைக் கற்கும் முறை, கற்பிக்கும் முறை, ஆசிரியர், மாணாக்கர் எனப் பயிற்றியல் மேலாண்மைத் திட்டவரைவை விளக்கும் பொதுப்பாயிரமும் இலக்கணக் கல்வியை வடிவமைக்கும் பாங்கு இந்நூலில் விரிவாகப் பேசப்படுகிறது.

காந்தி 1915: திரும்பி வந்த மைந்தன் (இ-புத்தகம்)

1915இல் சத்தியாக்கிரகத்தின் மூலம் தென்னாப்பிரிக்க இந்தியர்களுடைய உரிமைகளை மீட்டுத்தந்த தலைவராகத் தாயகம் திரும்புகிறார் காந்தி. இனி இந்திய விடுதலைக்குப் பங்களிக்க வேண்டும் என்பதுதான் அவருடைய விருப்பம். ஆனால் அதற்கு முன்னால் இந்தியாவை நன்றாகப் புரிந்துகொள்ள வேண்டும் என்கிறார் அவருடைய அரசியல் ஆசானான கோபால கிருஷ்ண கோகலே.

காந்தி ஓராண்டுக்கு இந்தியாவைச் சுற்றிப்பார்க்கிறார். மக்களை நெருக்கமாக அணுகிப் புரிந்துகொள்கிறார். அதன்பிறகு இந்திய விடுதலைப் போராட்டத்தில் தீவிரமாக இறங்குகிறார்.

 இந்திய விடுதலைப் போராட்டத்தின் முதன்மைத் தலைவராக, தேசத் தந்தையாகக் காந்தி பரிணாம வளர்ச்சி பெற்றதற்கான அடித்தளம், இந்தப் பயணத்தின்போது அவர் பெற்றுக்கொண்ட அனுபவங்களும் பாடங்களும்தான். காந்திக்கு இந்தியாவைப் புரியவைத்த அந்த ஓராண்டுப் பயணத்தைப் பற்றிய விரிவான பதிவு இந்நூல்.

சிப்கோ இயக்கம்: ஒரு மக்கள் வரலாறு (இ-புத்தகம்)

1973ஆம் ஆண்டில் நிறுவப்பட்ட சிப்கோ இயக்கத்தின் வழியாகவே இந்தியாவில் நவீனச் சூழலியல் இயக்கம் தொடங்கியது. சிப்கோ இயக்கச் செயல்பாடுகளால் மரங்களை வெட்டுவது தடுக்கப்பட்டதோடு, நீடித்த பயனுள்ள காடுகளுக்கும் அதைச் சார்ந்திருக்கும் மக்களுக்கும் இடையேயான சூழல் சமநிலையைப் பேணுவதில் இந்தியா கவனம் செலுத்தியது. கல்வியியல், கொள்கை வகுப்பாளர்கள் மத்தியில் வளங்குன்றா வளர்ச்சி குறித்த விரிவான விவாதங்களைக் கிளறிவிட்டது. 

சிப்கோவின் வரலாற்று அறிஞர்கள் இதுவரை சண்டி பிரசாத் பட், சுந்தர்லால் பகுகுணா ஆகிய இரண்டு முக்கியத் தலைவர்களைப் பற்றிக் கவனம் செலுத்தினார்கள். ஆனால் எளியோர்கள், இன்று சிப்கோ இருக்கக் காரணமான கௌரா தேவி போன்ற பெண்கள் உள்ளிட்ட அடிமட்டத்தைச் சேர்ந்தவர்களின் குரல்கள் பதிவு செய்யப்படவில்லை. சேகர் பாதக் இந்த மக்கள் வாழும் பகுதிகளில் வசித்தவர். நிலங்களை நுட்பமாக ஆராய்ந்தவர், போராட்டக்காரர்களையும் இயக்கக்காரர்களையும் சந்தித்து உரையாடியவர், அந்தக் காலகட்டத்தின் உள்ளூர் செய்தித் தாள்களைத் தேடிக் கண்டுபிடித்தவர். சிப்கோ இயக்கம் தலைமையிலும் கொள்கையிலும் பன்மைத்துவம் கொண்டிருந்தது என்பதையும் அது ஒருபோதும் காந்திய இயக்கமாக மட்டும் இருக்கவில்லை என்பதையும் காட்டுகிறார்.  

இந்த நூல் சிப்கோ இயக்க வரலாற்றின் அனைத்துப் பரிமாணங்களையும் ஆதாரபூர்வமாகப் பதிவுசெய்கிறது.

துடிமேளக்காரன் (இ-புத்தகம்)

சற்று முந்தியோ பிந்தியோ வந்தால் நாம் தவறவிட்டுவிடக்கூடிய குறுகிய தருணங்கள், உற்றுப் பார்த்தாலன்றி நமது ஊனக் கண்களுக்கு அவ்வளவாகப் புலப்படாத சிறிய மகத்துவங்கள், நெருங்கிப்போய் நின்றால் அல்லாமல் நெட்டுயிர்த்து நம்மால் சுவாசிக்கமுடியாத மிருதுவான நறுமணங்கள், குழந்தையின் மனம் கொண்டு திரிந்தால் மாத்திரமே தென்படும் திகைப்புகள் என நாம் எதிர்கொண்டு அவசரமாகக் கடந்திடும் அன்றாடத்தின் எளிய அனுபவங்களில் உள்ளுறைந்திருக்கும் அழகுகளையும் ஆழத்தையையும் அறுதியிட்டு, ‘இதோ இவ்வளவு பெறுமதிகளும் உங்களுக்கு உரிமையானவைதாம்!’ என நம்மிடம் உவக்கச் சொல்கின்றன இக் கவிதைகள். ஜானின் சுந்தரமான சொற்களில் இழைந்திருப்பது திகட்டச் செய்யும் இனிமை மட்டுமல்ல, இதழ்க்கடையில் இயல்பாக பூக்கும் நகையின் முடிவில் நம்மையறியாமல் விழிநுனியில் துளி நீர் கோர்த்து நிற்கும் அநாதரவான கணங்களும் அடங்கும். அந்தக் கரிப்புதான் இந்த கவிதைகளில் வெளிப்படும் வெகுளியான சிரிப்பை அழியாத ஒன்றாகவும் ஆக்குகிறது.

க. மோகனரங்கன்

காந்தி 1915: திரும்பி வந்த மைந்தன்

-1915, சத்தியாக்கிரகத்தின் மூலம் தென்னாப்பிரிக்க இந்தியர்களுடைய உரிமைகளை மீட்டுத்தந்த தலைவராகத் தாயகம் திரும்புகிறார் காந்தி. இனி இந்திய விடுதலைக்குப் பங்களிக்க வேண்டும் என்பதுதான் அவருடைய விருப்பம். ஆனால், அதற்கு முன்னால் இந்தியாவை நன்றாகப் புரிந்துகொள்ள வேண்டும் என்கிறார் அவருடைய அரசியல் ஆசானான கோபால கிருஷ்ண கோகலே.

காந்தி ஓராண்டுக்கு இந்தியாவைச் சுற்றிப்பார்க்கிறார். மக்களை நெருக்கமாக அணுகிப் புரிந்துகொள்கிறார். அதன்பிறகு இந்திய விடுதலைப் போராட்டத்தில் தீவிரமாக இறங்குகிறார்.

இந்திய விடுதலைப் போராட்டத்தின் முதன்மைத் தலைவராக, தேசத் தந்தையாகக் காந்தி பரிணாம வளர்ச்சி பெற்றதற்கான அடித்தளம், இந்தப் பயணத்தின்போது அவர் பெற்றுக்கொண்ட அனுபவங்களும் பாடங்களும்தான். காந்திக்கு இந்தியாவைப் புரியவைத்த அந்த ஓராண்டுப் பயணத்தைப் பற்றிய விரிவான பதிவு இந்நூல்.

சிப்கோ இயக்கம்(ஒரு மக்கள் வரலாறு)

-1973ஆம் ஆண்டில் நிறுவப்பட்ட சிப்கோ இயக்கத்தின் வழியாகவே இந்தியாவில் நவீனச் சூழலியல் இயக்கம் தொடங்கியது. சிப்கோ இயக்கத்தின் காரணமாக மரங்களை வெட்டுவது தடுக்கப்பட்டதோடு, நீடித்த பயனுள்ள காடுகளுக்கும் அதைச் சார்ந்திருக்கும் மக்களுக்கும் இடையேயான சூழல் சமநிலையைப் பேணுவதில் இந்தியா கவனம் செலுத்தியது. கல்வியியல், கொள்கை உருவாக்கும் வட்டாரங்களில் வளங்குன்றா வளர்ச்சி குறித்த விரிவான விவாதங்களைக் கிளறிவிட்டது. 

சிப்கோவின் வரலாற்று அறிஞர்கள் இதுவரை சண்டி பிரசாத் பட், சுந்தர்லால் பகுகுணா ஆகிய இரண்டு முக்கியத் தலைவர்களைப் பற்றி கவனம் செலுத்தினார்கள். ஆனால், எளியோர்கள், இன்று சிப்கோ இருக்கக் காரணமான கௌரா தேவி போன்ற பெண்கள் உள்ளிட்ட அடிமட்டத்தைச் சேர்ந்தவர்களின் குரல்கள் பதிவு செய்யப்படவே இல்லை. சேகர் பதக் இந்த மக்கள் வாழும் பகுதிகளில் வசித்தவர். நிலங்களை நுட்பமாக ஆராய்ந்தவர், போராட்டக்காரர்களையும் இயக்கத்தைச் சேர்ந்தவர்களையும் சந்தித்து உரையாடியவர். அந்த காலகட்டத்தின் உள்ளூர் செய்தித்தாள்களை தேடிக் கண்டுபிடித்தவர். சிப்கோ இயக்கம் தலைமையிலும் கொள்கையிலும் பன்மைத்துவம் கொண்டிருந்தது என்பதையும் அது ஒருபோதும் காந்திய இயக்கமாக மட்டும் இருக்கவில்லை என்றும் காட்டுகிறார். 

இந்த நூல் சிப்கோ இயக்கத்தின் வரலாற்றின் அனைத்துப் பரிமாணங்கலையும் ஆதாரப்பூர்வமாகப் பதிவுசெய்கிறது.

எஸ்தர் (இ-புத்தகம்)

சென்ற நூற்றாண்டின் 76களில் வெளியான 'எஸ்தர்' சிறுகதைத் தொகுதி, தமிழ்ப் புனைகதை வெளியில் அரை நூற்றாண்டைக் கடந்து இன்றும் தன் அடர்த்தி குறையாமல் நிலைத்திருக்கிறது. எழுபதுகளின் தமிழ்ச் சிறுகதை மரபில் எந்தவிதப் பாசாங்குமற்று, வாழ்வை அதன் அசல் தன்மையோடு எதிர்கொண்டவர் வண்ணநிலவன். அவரது புனைகதை உலகிற்குள் நுழைவதற்கான வாசல் இந்நூல். உதாசீனங்களின் நடுவிலும் ஈரம் காயாத மனங்கள், வறுமையின் விளிம்பிலும் அறம் நழுவாத எளிய மனிதர்கள், அகம் உருகும் தருணங்களின் மௌனம் என இத்தொகுப்பில் உள்ள 17 கதைகளும் வாசகரது மனதை அலைக்கழிக்கின்றன. வார்த்தைகளின் ஆடம்பரமில்லாத நேரடிப் பகிர்வும், நுட்பமான பாத்திர வார்ப்பும் கொண்ட இக்கதைகள் தமிழ் யதார்த்தச் சிறுகதைப் போக்கிற்குத் தனித்துவமான அழகியலைக் கூட்டியவை. வாழ்வின் துயரங்களுக்கு இடையிலும் மானுடப் பற்றின் சுனைகளைக் கண்டடையும் இப்படைப்புகள், வாசித்து முடித்த பிறகும் நம் மன அடுக்குக்குள் தீராத நடுக்கத்தையும் பிரியத்தையும் எஞ்சியிருக்கச் செய்கின்றன.