'அருந்ததியர் ஒருங்கிணைப்புக் குழு' வெளியிட்டுள்ள 'மறுவாழ்வு' என்னும் சிறு வெளியீடு, அம்மக்களின் துயரத்தையும் அதை நிவர்த்தி செய்வதற்கான வழிமுறைகளையும் பேசுகிறது. உயிரைப் பணயம் வைத்து நோய்க் கிருமிகள் நிரம்பியுள்ள மலக்குழிகளில் இறங்கித் துப்புரவு செய்யும் தொழிலாளர்களுக்கு, நூற்பாலைகள் நிறுவுதல், விசைத்தறிகள் அமைத்தல், பால் பண்ணைகள் அமைத்தல், காலணி மற்றும் டயர் உற்பத்தித் தொழிற்சாலைகளை அமைத்தல் போன்ற மாற்று ஏற்பாடுகளைப் பரிந்துரைத்துள்ளார் நூலாசிரியர் ஜனகப்பிரியா.

மனிதர்கள் அனைவரையும் தன்னைப்போல் மதிக்கிற நாகரிகம் - மனிதநேய உணர்வு வளர்வதற்கு நமது கல்விப்புலம், பண்பாட்டுப்புலம், அரசியற்புலம் ஆகியவற்றில் முயற்சிகளை முன்னெடுக்க வேண்டும் என்பதையும் நூலாசிரியர் அழுத்தமாக வலியுறுத்தியுள்ளார்.