மூன்றாவது கண் : த ஹிண்டு தலையங்கம்

பத்திரிகைச் சுதந்திரம் மீதான கொலைவெறித் தாக்குதல்

இந்தக் கோரச் சம்பவத்தால் தான் ஆடிப்போயிருப்பதை வெளிப்படையாக ஒப்புக்கொண்ட முதல்வர் கருணாநிதி, தாக்குதலை மட்டுமின்றி அந்தக் கருத்துக் கணிப்பைப் பிரசுரித்ததற்கும் கண்டனம் தெரிவித்திருக்கிறார்; தனது அரசியல் வாரிசு பற்றிய பேச்சே எழக் கூடாது என்று கூறியிருக்கிறார்; தனது கட்சி ஒரு ஜனநாயக அமைப்பு என்றும் இத்தகைய பேச்சுக்கு அதில் இடமில்லை என்றும் வலியுறுத்தியிருக்கிறார். இப்போது அவரது அரசின் நற்பெயர் பலவீனமடையக் கூடாது என்றால், தவறு செய்யும் தனது மகனுக்கு அவர் தகுந்த தண்டனை அளித்து மற்றவர்கள் அவரைப் பின்பற்றாத வகையில் தடுக்க வேண்டும். திறமையான நிர்வாகத்திற்கும் ஆட்சியில் யார் இருந்தாலும் அவர்களைச் சிறிதும் சார்ந்திராத வளர்ச்சிப் போக்கிற்கும் பேர்போன மாநிலமான தமிழகம், அரசியல் சாசனம் சாராத அதிகார மையங்கள் அனைத்தையும் நிர்வாகம் மற்றும் சட்டத்தின் ஆட்சிமீதான முறையற்ற குறுக்கீடுகளையும் உடனடியாக ஒழித்தாக வேண்டும். அரசியல் செல்வாக்கும் ஆள் பலமும் கொண்டவர்களுக்கு எதிராகச் சட்டத்தைப் பின்பற்றிச் செயல்படுவதில் தனக்குள்ள இயலாமையைத் தமிழகக் காவல் துறை மீண்டும் ஒரு முறை காட்டிக் கொண்டுவிட்டது. முதல்வர் கருணாநிதி தனது நிர்வாகத்தின் நம்பகத்தன்மையைக் காப்பாற்றிக்கொள்ள மதுரைச் சம்பவம் குறித்து சி.பி.ஐ. விசாரணை நடத்துவது நல்லது. அரை நூற்றாண்டுக் காலம் சட்டமன்ற உறுப்பினராக இருந்து குறிப்பிடத்தக்க ஒரு ஜனநாயக மைல்கல்லை எட்டியவர், இந்தத் துயரச் சம்பவம் அந்தச் சாதனைக்குக் களங்கம் விளைவிக்கவோ அதைப் பாதிக்கவோ அனுமதிக்கக் கூடாது.

நன்றி: த ஹிண்டு நாளிதழ், 10.05.2007

n n n

பத்திரிகையாளர் தீர்மானம்

சென்னை நிருபர்கள் சங்கம், சென்னைப் பத்திரிகையாளர் சங்கம், தமிழ்நாடு பத்திரிகையாளர் சங்கம், தேசியப் பத்திரிகையாளர் சங்கம், ஏஎம்ஜேஏ, தமிழ் நாடு பத்திரிகை மற்றும் புகைப்படக் கலைஞர் சங்கம், சென்னை பிரஸ் கிளப் ஆகிய அமைப்புகளின் தலைவர்களும் பொறுப்பாளர்களும் கையொப்பமிட்ட அறிக்கை. நாள்: 10.05.2007.

தமிழ்நாட்டின் பல இடங்களில், குறிப்பாக மே 9, 2007 அன்று மூன்று உயிர்கள் பலியிடப்பட்டுப் பல லட்ச ரூபாய் மதிப்புள்ள சொத்துகள் சேதப்படுத்தப்பட்ட மதுரையில், தினகரன் குழுமச் செய்தித்தாள்கள்மீது நடத்தப்பட்ட கோழைத்தனமான தாக்குதலைத் தமிழகப் பத்திரிகையாளர் அமைப்புகளான நாங்கள் கண்டிக்கிறோம்.

தமிழக முதல்வர் இச்சம்பவங்கள் குறித்து சி.பி.ஐ. புலனாய்வு நடத்த உத்தரவிட்டிருப்பதையும் உயிரிழந்தவர்களின் குடும்பங்களுக்கு நஷ்டஈடு வழங்கியிருப்பதையும் நாங்கள் (சென்னை நிருபர்கள் சங்கம், சென்னைப் பத்திரிகையாளர் சங்கம், தேசியப் பத்திரிகையாளர் சங்கம், தமிழ்நாடு பத்திரிகையாளர் சங்கம், அனைத்து ஊடகப் பத்திரிகையாளர் சங்கங்கள், சென்னை பிரஸ் கிளப், தமிழ்நாடு பத்திரிகை புகைப்படக் கலைஞர்கள் சங்கம்) வரவேற்கிறோம். இருப்பினும், இந்நடவடிக்கைகள் போதாது என்று நாங்கள் கருதுகிறோம். இச்சம்பவங்களின்போது சில காவல் துறை அதிகாரிகள், குறிப்பாக மதுரையில், அக்கறைகாட்டாமல் இருந்தார்கள் என்னும் குற்றச்சாட்டு குறித்து முழுமூச்சிலான விசாரணை ஒன்று நடத்தப்பட வேண்டும் என்று நாங்கள் கோருகிறோம்.

மதுரையிலும் தமிழகத்தில் பல்வேறு இடங்களிலும் ஒரே சமயத்தில் நடந்த காட்டுமிராண்டித்தனமான தாக்குதல்கள், அவை சதியாளர்கள் குழு ஒன்றினால் முன்பே திட்டமிடப்பட்டு நடத்தப்பட்டவை என்பதைத் தெளிவாகக் காட்டுகின்றன. இத் தாக்குதல்களில் நேரடியாகப் பங்கேற்றுத் தாக்கியவர்கள்மீது மட்டும் நடவடிக்கை எடுக்கப்பட்டால் போதாது. இச்சதிக்குப் பின்னணியில் இருந்தவர்களை, அவர்கள் எவ்வளவு உயர்ந்த இடத்தில் இருந்தாலும், காவல் துறை அடையாளம் கண்டு, தேடிப் பிடித்து, உடனடியாக வழக்குப் பதிவுசெய்ய வேண்டும். பத்திரிகை சுதந்திரம் பாதுகாக்கப்படுவதையும் சட்டம் மற்றும் நீதியின் ஆட்சி மீட்கப்படுவதையும் உறுதிசெய்ய, மதுரையிலும் பிற இடங்களிலும் காவல் துறையின் மெத்தனத்திற்குப் பொறுப்பான காவல் துறை அதிகாரிகள் உடனடியாகத் துறைவழி நடவடிக்கைகளுக்கு உட்படுத்தப்பட வேண்டும். மதுரைச் சம்பவத்திற்குக் காரணமானவர்களைத் தெளிவாக அடையாளம் காட்டிச் சதியாளர்களின் பெயர்களையும் தந்திருக்கும் தினகரன் செய்தி ஆசிரியர் திரு. முத்துப்பாண்டியன் பதிவுசெய்த புகாரின் அடிப்படையில் மதுரையில் உள்ள ஒத்தக்கடை காவல் நிலையத்தில் முதல் தகவல் அறிக்கை பதிவுசெய்யப் பட வேண்டும் என்றும் நாங்கள் வலியுறுத்துகிறோம். உதவி ஆய்வாளர் ஒருவர் தந்த தகவலின் அடிப்படையில் முதல் தகவல் அறிக்கை ஒன்றைப் பதிவுசெய்வது நீதியை முடக்குவதாகும். திரு. முத்துப் பாண்டியன் தந்த புகாரின் அடிப்படையில் புலனாய்வு நடத்தும்படி காவல் துறைக்கு உத்தரவிடப்பட வேண்டும். தமிழகத்தில் சுதந்திரம் நிலைநிற்க, மதுரையில் அரசியல் சாசனம் சாராத அதிகாரம் கொண்டவர் சட்டப்படி விசாரிக்கப்பட்டுக் கட்டுப்படுத்தப்படத் தமிழக முதல் வரும் காவல் துறையும் வழிசெய்ய வேண்டும். சதியாளர்கள், தாக்குதல் நடத்தியவர்கள், அவர்களது தொடர்பாளர்கள் ஆகியோரின் செல் ஃபோன்கள் பறிமுதல் செய்யப்பட்டு, சதிக்குப் பின்னணியில் இருந்தவர்களை அம்பலப்படுத்த அவற்றில் உள்ள தகவல்கள் குறித்து முழு மூச்சிலான விசாரணை நடத்தப்பட வேண்டும் என்றும் வலியுறுத்துகிறோம். இந்நடவடிக்கைகள் அனைத்தும் இன்றிரவோ அல்லது 2007 மே 11 வாக்கிலோ மேற்கொள்ளப்பட வேண்டும்.

இக்கோரிக்கைகளை வலியுறுத்தவும் சதியாளர்களிடமிருந்து தீவிர அபாயத்தை எதிர்கொண்டிருக்கும் தினகரன் ஊழியர்களுக்கு எங்கள் ஆதரவைத் தெரிவிக்கவும் இதழியல் அமைப்புகளாகிய நாங்கள் 2007 மே 12 (சனிக்கிழமை) அன்று மதியம் 3 மணியளவில் மயிலாப்பூர் லஸ் அருகில் கச்சேரி சாலையில் அமைந்த தினகரன் அலுவலகத்திலிருந்து தமிழகக் காவல் துறை இயக்குநரகம்வரை பேரணி செல்ல அழைப்பு விடுத்திருக்கிறோம். இப்பேரணி அமைதியாக நடக்கும். சென்னையில் உள்ள அனைத்து இதழியலாளர்களும் இதில் பங்கேற்பார்கள்.

கோரிக்கைகள் நிறைவேற்றப்படும்வரை ஆதரவு நடவடிக்கைகள் தொடரும் என இன்று சென்னை நிருபர்கள் சங்கத்தின் அலுவலகக் கட்டடத்தில் நடந்த கூட்டத்தில் முடிவுசெய்யப்பட்டது.

n n n

மக்கள் கண்காணிப்பகத்தின் நிர்வாக இயக்குநர் ஹென்றி டிபேன், மனித உரிமைக்கான குடிமக்கள் இயக்கத்தின் மாநில ஒருங்கிணைப்பாளர் சி.சே. இராசன் சேர்ந்து அளித்த, 10.05.2007 நாளிட்ட கண்டன அறிக்கையின் சில பகுதிகள்.

'தினகரன்' நாளிதழில் 'கலைஞரின் அரசியல் வாரிசு யார்?' என்ற கருத்துக் கணிப்பு 09.05.07இல் வெளியிடப்பட்டது. அமைச்சர் ஸ்டாலின் 70 சதவிகிதமும் மு.க. அழகிரி 2 சதவிகிதமும் பெற்றுள்ளதாக வெளியிடப்பட்டது. இதில் ஆத்திரமடைந்த மு.க. அழகிரி ஆதரவாளர்கள் மதுரை நகரில் வன்முறையில் இறங்கி அரசு பேருந்துகளை அடித்து நொறுக்கி, 'தினகரன்' நாளிதழ்களை எரித்தனர்.

தொடர்ந்து, கடைகளை அடைக்கக் கூறி ரவுடிகள் களத்தில் இறங்கிக் கடைகளை மூடியுள்ளனர். பொது மக்களை அடித்து விரட்டி நடமாட முடியாது செய்துள்ளனர். மதுரை மக்களை அடித்து விரட்டிக்கொண்டிருந்த ரவுடிகள் 'தினகரன்' அலுவலகம் சென்றனர். அங்கு ஊமச்சிக்குளம் டி.எஸ்.பி. ராஜாராம் தலைமையில் பாதுகாப்பில் 25 போலீசார் ஈடுபட்டிருந்தனர். காவல் துறையினர் இருப்பதை அறிந்து அவர்களது துணையோடு தினகரன் அலுவலகம்மீது பெட்ரோல் குண்டுகள் வீசித் தீயிட்டு அடித்து நொறுக்கியது ரவுடிகள் கும்பல்.

இதில் 'தினகரன்' நாளிதழில் பணியாற்றிய மூன்று ஊழியர்கள் கோபிநாத், வினோத்குமார், முத்துராமலிங்கம் ஆகியோர் படுகொலை செய்யப்பட்டனர். மதுரை நகரில் மிகவும் பதட்டமான சூழ்நிலையும் பாதுகாப்பற்ற நிலையும் கடந்த இரு நாட்களாக நிலவிவருகின்றன. மக்கள் நடமாட முடியாது தவிக்கும் நிலை ஏற்பட்டுள்ளது.

பத்திரிகைச் சுதந்திரம் குழிதோண்டிப் புதைக்கப்பட்டுள்ளதை இச்சம்பவம் உணர்த்துகிறது. ஜனநாயகம் கேள்விக்குறியாக உள்ளது. பத்திரிகையாளர்கள்மீது நடந்த தாக்குதல் மிகப் பெரிய மனித உரிமை மீறலாகும்.

காவல் துறையினர் ஒத்துழைப் போடுதான் இச்சம்பவம் நிறைவேறியுள்ளது. மதுரை நகர் மற்றும் மாவட்டக் காவல் துறை செயல்படாத நிலையில் கடந்த இரு நாட்களாக உள்ளன.

மாவட்ட நிர்வாகமும் செயல்படாத நிலையில் உள்ளது. சட்டம் ஒழுங்கை நிலைநாட்டி ரவுடிகள் கையில் உள்ள மதுரை மாநகரை மீட்டு சம்பந்தப்பட்டவர்களை உடனடியாகக் கைதுசெய்து நடவடிக்கை எடுக்க மக்கள் கண்காணிப்பகமும் மனித உரிமைக்கான குடிமக்கள் இயக்கமும் தமிழக அரசைக் கேட்டுக்கொள்கிறது.

சட்டத்தின் ஆட்சியை நடத்த உடனடியாகத் தமிழக அரசு நடவடிக்கை எடுக்க வேண்டும். ரவுடியிசத்தை ஒழித்து, மக்கள் அச்சமின்றி பணிபுரிய உரிய சூழ் நிலையை உருவாக்க வேண்டுமென மக்கள் கண்காணிப்பகமும் மனித உரிமைக்கான குடிமக்கள் இயக்கமும் கேட்டுக்கொள்கின்றன.